2025-yil oktyabr oyida Chexiya Respublikasining Brno shahrida MSV-2025 nomli yirik sanoat ko‘rgazmasi bo‘lib o‘tdi. Tadbirda 35 ta mamlakatdan 1 300 dan ortiq kompaniyalar ishtirok etdi. Ko‘rgazma ekspozitsiyalarida mashinasozlik, avtomatlashtirish, metallurgiya, energetika va ishlab chiqarish texnologiyalari sohalaridagi eng so‘nggi ishlanmalar namoyish etildi.
MSV Yevropadagi eng nufuzli biznes maydonlaridan biri hisoblanadi — bu yerda uskunalar ishlab chiqaruvchilari, texnologiya yetkazib beruvchilari va sanoat sohasi vakillari tajriba almashish hamda uzoq muddatli hamkorlikni yo‘lga qo‘yish uchun uchrashadilar.
Bu yilgi ko‘rgazma «Kelajak sanoati — bugun» shiori ostida o‘tkazildi. Tadbirda barqaror ishlab chiqarish, raqamlashtirish va sanoat avtomatlashtirishidagi innovatsion yondashuvlarga alohida e’tibor qaratildi.
Toshkent Metallurgiya Zavodi jamoasi «Made in Uzbekistan» milliy dasturi doirasida MSV-2025 ko‘rgazmasida ishtirok etib, O‘zbekistonni xalqaro ekspozitsiyada munosib tarzda taqdim etdi.
Zavod vakillari metallni qayta ishlash va avtomatlashtirilgan ishlab chiqarish tizimlaridagi yangi texnologiyalar bilan tanishdilar, potensial hamkorlar bilan B2B uchrashuvlar o‘tkazdilar hamda eksport masalalari va zamonaviy yechimlarni metallurgiya sohasida joriy etish imkoniyatlarini muhokama qildilar.
Toshkent Metallurgiya Zavodining ushbu ko‘rgazmadagi ishtiroki korxonaning eksport salohiyatini mustahkamlash va xalqaro hamkorlikni rivojlantirish yo‘lidagi muhim qadamlardan biri bo‘ldi.
